Regim deth personau

Eth personau funcionari e eventuau ath servici deth Burèu Antifrauda se regís pera Lei 14/2008, de 5 de noveme, pes Normes d’actuacion e de regim interior deth Burèu Antifrauda de Catalonha e pes Estatuts deth regim e deth govern interiors deth Parlament de Catalonha.

Eth personau laborau ath servici deth Burèu Antifrauda se regís pera Lei 14/2008, de 5 de noveme, pes Normes d’actuacion e de regim interior deth Burèu Antifrauda de Catalonha, pera legislacion laborau e pes Estatuts deth regim e deth govern interiors deth Parlament de Catalonha.

Eth personau Antifrauda s’a de comportar damb imparcialitat en exercici des sues foncions, a de veilar per interès generau e observar era mès estricta neutralitat politica. Atau, a d’empachar que critèris e interèssi proposats per grops economics, sociaus, corporatius, ideologics o religiosi influïssen enes sues actuacions. Eth personau deth Burèu a d’agir tostemp damb plen respècte ar ordenament juridic.

Eth personau ath servici deth Burèu Antifrauda, sense perjudici des déuers establits enes Estatuts deth regim e eth govèrn interiors deth Parlament de Catalonha, demore obligat especiaument a:

• Sauvar eth secret sus totes aqueres informacions ligades as recèrques amiades per Antifrauda, coma tanben mantier era deguda resèrva sus quinsevolh auta informacion que n’age auut coneishement mercés as sues foncions e que non age d’èster divulgada. Damb aguesta tòca, en moment dera incorporacion ath Burèu Antifrauda, eth personau signarà un engatjament de confidencialitat que garantisque era plea assumpcion des responsabilitats, includida era civila, derivades dera revelacion indeguda d’informacions, dades, actes, documents o ahèrs. Aguest engatjament a caractèr permanent e manten era sua vigéncia quan s’age deishat de dar servicis ath Burèu.
• Complir es normes de foncionament intèrn e de seguretat deth Burèu Antifrauda de Catalonha.
• Comportar-se professionaument e personaument entà evitar situacions determinantes de risc entara reputacion dera institucion.
• Evitar era exibicion injustificada dera acreditacion professionau, o ben servir-se dera condicion de membre deth Burèu Antifrauda entà guanhar influéncia, obtier un tracte de favor o per interèssi personaus.
• Liurar era documentacion ara quau hèn referéncia es articles 47.2 e 48 des Normes d’actuacion e regim interior deth Burèu Antifrauda de Catalonha.

Entà pr’amor de preservar era independéncia e era integritat deth Burèu Antifrauda, es conflictes d’interès seràn interpretats amplament, de manèra que cap membre d’Antifrauda, en exercici des sues foncions, non poirà intervier en un ahèr a on dirèctament o indirèctament age interèssi deth tipe que sigue que comprometen era sua imparcialitat e, en particular, interèssi personaus, familiars o economics.

Eth personau ath servici deth Burèu Antifrauda s’abstierà d’intervier enes casi que seguissen e n’aurà d’informar tot de seguit ath director o directora:

• Enes ahèrs a on age pres part o que siguen en relacion damb enterpreses o societats ena direccion, era assessoracion o era administracion des quaus age pres part aquera persona, eth sòn conjonch o es persones damb qui convisque damb analòga relacion d’afectivitat o familiars laguens deth dusau grad, e enes dus ans anteriors ara sua incorporacion ath Burèu.
• Enes ahèrs a on agent un interès personau, familiar o economic, e tanben en tota activitat que pogue comportar un risc de pausar era possibilitat de conflictes d’interès damb era sua responsabilitat en Burèu Antifrauda.

Correspon en tot cas ath director o directora deth Burèu Antifrauda decidir se se da un des supausats d’abstencion mençonats.

Era infraccion deth déuer d’abstencion darà lòc ara exigéncia des responsabilitats oportunes.

Ath director o directora, ath director adjunt o directora adjunta e as membres deth Burèu Antifrauda de Catalonha qu’agen era consideracion de naut cargue, les serà d’aplicacion eth regim d’incompatibilitats previst ena Lei 13/2005, de 17 de deseme, deth regim d’incompatibilitats des nauti cargues ath servici dera Generalitat.

Era rèsta de personau ath servici deth Burèu se regís peth regim d’incompatibilitats previst entath personau ath servici deth Parlament de Catalonha enes sòns Estatuts de regim e govèrn interiors.

Correspon ath director o directora d’Antifrauda resòlver es sollicituds de compatibilitat.

Entà pr’amor de previer e detectar situacions que poguen originar conflictges d’interès o auments de patrimòni non justificats, eth personau ath servici deth Burèu Antifrauda a de liurar annaument ua còpia dera sua declaracion des taxes sus era renda des persones fisiques. Damb aguesta madeisha tòca, eth director o directora d’Antifrauda poirà exigir ath personau ena forma, era periodicitat e es terminis que fixe, eth liurament dera documentacion acreditativa dera titularitat de bens, obligacions o drets patrimoniaus que creigue oportuna.

Sense perjudici de çò qu’establís eth Còdi penau, eth personau deth Burèu Antifrauda non pòt pas acceptar dirèctament ne indirèctament cap de tractament de favor, privilègi o auantatge injustificat que se li aufrisque damb motiu o en ocasion der exercici des sues foncions. Atau tanben, a de refusar quinsevolh present, favor o servici en condicions d’auantatge, cession gratuïta d’emplec o donacion que vagen ath delà des usi de cortesia interinstitucionau, que, s’ei eth cas, seràn inventariadi e dipositadi tostemp ena sedença deth Burèu.