Èm ua institucion especificament dirigica a preservar era transparéncia e era integritat des administracions e deth personau ath servici deth sector public en Catalonha. Antifrauda a coma tòca prioritària previer e recercar possibles casi d’emplec o destinacion fraudolosi de hons publics o bèth aute profitament illicit derivat de conductes que compòrten conflicte d’interèssi o er emplec particular d’informacions derivades des foncions pròpries deth personau ath servici deth sector public.
Veilam entà qu’era actuacion des podèrs publics e des sòns representants sigue coerenta damb es valors d’integritat, aunestedat, transparéncia, legalitat, neutralitat, imparcialitat e objectivitat.
Tanben actuam coma canau extèrne entà comunicar infraccions dera Lei 2/2023 e aufrim supòrt e emparament as persones informants d’acòrd damb era DA 7ª dera Lei 3/2023 d’acompanhament as pressupòsti.
Eth contraròtle dera nòsta activitat correspon ath Parlament de Catalonha, a qui rendem compdes. Depéner der organisme que represente era sobirania de toti es catalans e catalanes legitime eth nòste prètzhèt e ne garantís era independéncia.
Eth Burèu Antifrauda de Catalonha siguec creat pera Lei 14/2008, de 5 de noveme, e comencèc era sua activitat eth darrèr trimestre de 2009. Èm era institucion pionèra en Estat espanhòu en dar compliment as mandats dera Convencion des Nacions Unides contra era corrupcion.
Mission e foncions
Deth Burèu Antifrauda estant possam iniciatives entà assolidar sistèmes d’integritat enes institucions deth sector public, des ajuntaments enquiath Govèrn dera Generalitat, e promoiguem es valors sociaus que dificulten es conductes corruptes o contràries ar interès public. Èm ua institucion adreçada a promòir e preservar era transparéncia e era integritat des administracions e deth personau ath servici deth sector public en Catalonha.
En Burèu Antifrauda desvolopam era nòsta activitat ath torn de dus èishi:
- Prevencion dera corrupcion: promoiguem e possam bones practiques que contribuïssen ar amelhorament dera qualitat en servici public e dan assisténcia e supòrt as administracions e d’autes entitats que formen eth sector public de Catalonha. Tanben collabòren ena formacion e assessorament deth personau ath servici des administracions, en tot elaborar aisines e ressorses e en tot formular propòstes e recomanacions d’acòrd damb es risqui detectadi e a partir deth seguiment dera activitat deth Burèu madeish. Tanben promoiguem valors sociaus que dificulten era aparicion e tolerància de comportaments contraris ara integritat en sector public e en privat.
- Recèrca des casi de corrupcion: prumèr, determinam era versemblança des hèts o des conductes qu’an estat objècte de denóncia. Eth resultat d’aguesta analisi comportarà er inici d’actuacions de recèrca o eth sòn archivament. Passada era fase de versemblança, s’inícien es actuacions de perquisicion o d’inspeccion de possibles casi concrets d’emplec o destinacion irregulars de hons publics. Tanben des conductes opausades ara probitat o contràries as principis d’objectivitat, eficacitat o somission plea ara lei e ath dret.
- Emparament des persones que informen sobri infraccions deth Dret dera Union o sobri delictes e infraccions administratives grèus o fòrça grèus: per acomplir eficaçment aguesta foncion podem tramitar e imposar sancions e adoptar mesures provisionaus en marc deth procediment sancionador.
Es administracions publiques son obligades d’auxiliar de manèra preferenta e urgenta ath Burèu Antifrauda de Catalonha enes recèrques e inspeccions qu’amien. Aguest déuer de collaboracion s’esten tanben as as particulars, persones fisiques o juridiques, administracions publiques o entitats includides en domeni d’actuacion deth Burèu Antifrauda.
D’Antifrauda estant cooperaram damb era rèsta d’organs de contraròtle dera actuacion dera administracion, per mejan der intercambi d’informacion e d’experiéncies, e dera coordinacion des nòstes foncions.
