Era Lei de transparéncia, accès ara informacion publica e bon govèrn regule e garantís era transparéncia dera activitat publica e eth dret d’accès des ciutadans ara informacion e documentacion publiques.
Era lei tanben cree un portau de transparéncia, un registre de grops d’interès e era Comission de Garantia deth Dret d’Accès ara Informacion Publica (GAIP); regule eth silenci administratiu positiu e er exercici deth dret d’accès ara informacion a partir des setze ans; fixe en un mes eth termini entà resòler es peticions, e establís un sistèma de garanties e reclamacions e un regim sancionador (que compren, per exemple, sancions d’enquia 12.000 èuros e era destitucion de nauti cargues per infraccions plan grèus). Tanben, balhe ath Sindic de Grèuges, era Sindicatura de Compdes e eth Burèu Antifrauda de Catalonha era facultat de veilar peth compliment des obligacions e es drets qu’establís.
Era iniciativa ei aplicabla ara Generalitat, ara administracion locau, ath Parlament e as organs estatutaris, as universitats, as grops d’interès, as persones fisiques o juridiques que balhen servicis publics o que receben hons publics, as partits politics, as organizacions sindicaus e d’enterpreses e as entitats privades que receben subvencions. Era Resolucion PRE/398/2015, de 3 de març, designe er organ departamentau a qui s’atribuís era condicion d’unitat d’informacion en matèria de transparéncia e informacion publica deth Departament dera Presidéncia.
Deth Burèu Antifrauda estant auem participat ena Proposicion de lei de transparéncia, accès ara informacion publica e bon govèrn, damb intervencions en espaci Escó 136 e damb ua seguida de recomanacions e suggeriments qu’auem adreçat ath Parlament. Vedetz eth document damb es aportacions Burèu Antifrauda de Catalonha.
Antifrauda tanben a elaborat un document de comentaris e consideracions sus era aplicacion dera normativa en vigor sus transparéncia en Catalonha e era reaccion qu’aurà damb era normativa estatau. Vedetz es comentaris d’Antifrauda sus era aplicacion dera Lei de transparéncia.
Per un aute costat, es entitats municipalistes Associacion Catalana de Municipis (ACM) e Federacion de Municipis de Catalonha (FMC) an publicat ua guia per a la implantació als ajuntaments de la Llei de transparència, elaborada peth catedratic de Dret Constitucionau Rafael Jiménez Asensio.
