Miguel Ángel Gimeno Jubero
Neishut en Binèfar, licenciat en Dret pera Universitat de Barcelona eth 1975, damb un postgrad de Dret Civil Catalan dera Universitat Oberta de Catalunya eth 2001.
Era sua trajectòria professionau l’a amiada tota en Catalonha. Exercica coma avocat deth 1976 ath 1980. Eth deseme de 1982 comencèc era carrèra judiciau e siguec nomat jutge eth hereuèr de 1983. Ascendic a magistrat eth 1987 e era màger part dera sua carrèra l’a desvolpat ena jurisdiccion penau.
A hèt de jutge en El Prag de Llobregat (1983-84), e de jutge degan en Badalona (1984-85) e en L’Hospitalet de Llobregat (1985-87). Coma magistrat a exercit en Jutjat de Prumèra Instància e Instruccion num. 3 de L’Hospitalet de Llobregat (1987-89), en Jutjat d’Instruccion num. 22 de Barcelona (1989-91), en Jutjat Penau num. 4 de Barcelona (1991-93) e ena seccion 10au dera Audiéncia Provinciau de Barcelona (1993-2000). A estat president dera Seccion 6au dera Audiéncia Provinciau de Barcelona (2000-2010). En parallèl, de 2004 a 2007, siguec membre deth Conselh Rector dera Escòla Judiciau e eth 2006 siguec nomat membre dera Comission pedagogica de formacion iniciau dera Escòla Judiciau.
Tanben a estat president deth Tribunau Superior de Justícia de Catalonha (TSJC) deth 2010 ath 2015, e dempús magistrat dera Sala Civila e Penau deth TSJC enquiath seteme de 2016, quan siguec nomat director deth Burèu Antifrauda de Catalonha.
Per un aute costat, a desvolopat era carrèra judiciau ath costat dera docéncia ena Escòla de Policia de Catalonha (1991), ena Universitat Autonòma de Barcelona (1992-94) coma professor associat de Dret Penau, e ena Universitat de Barcelona (2000-08) e er Illustre Collègi dera Advocacia de Barcelona (2005-09) coma professor de diuèrsi màsters en airau deth Dret Penau.
-
Dirigís eth Burèu Antifrauda de Catalonha e n’exercís era representacion institucionau e legau.
-
Coordine, survelhe e avalue es actuacions amiades per Antifrauda.
-
Apròve era avantprojècte de butgèt dera institucion e ne seleccione, nome e contracte ath personau.
Actue damb plea independéncia e objectivitat en exercici des sues foncions e non recep instruccions de cap d’autoritat; demore donques sosmetut sonqu’ar ordenament jurici.
Eth director deth Burèu Antifrauda de Catalonha ei causit peth Parlament entre es ciutadans majors d’atge qu’agen es condicions d’idoneïtat, probitat e professionalitat de besonh entà exercir eth cargue.
Eth president o presidenta dera Generalitat, en nom deth Govèrn, propòse ara persona elegibla, qu’ei escuelhuda peth Plen deth Parlament per majoritat de tres cincaus parts. Se non obten pas era majoritat de besonh, cau que se sotmete a ua dusau votacion que requerís eth vòt a favor dera majoritat absoluda des membres dera Cramba. Eth mandat deth director ei de sies ans non renauibles.
